Apisar ginsirado na ang Palaiopyrgos Bridge sa Greece matapos matiphag tuga sang grabe nga pagbaha nga dala sang bagyo sang tuig 2023, padayon ini gihapon nga ginagamit sang mga motorista.
Isa ang Greece sa mga pungsod nga pinaka-apektado sang bagyo sang nasambit nga tuig, sa diin linibo ka mga indibidwal ang ginpangbawian sang kabuhi kag bilyon bilyon ka dolyar ang halit sa mga imprastraktura.
Pinaka-naapektohan ang rehiyon sang Thessaly kun sa diin 79 ka mga taytay ang indi na magamit bangud sa malapad nga pagbaha.
Kalakip sa mga naguba ang Palaiopyrgos Bridge, isa ka mayor nga alagyan nga naga-angot sa coastal communities sa banwa sang Tempi kag Agia.
Natiphag ang sa tunga nga bahin sang taytay kag halos nagadapat na ini sa tubig sang suba.
Ginsirado na ang nasambit nga ruta apang wala man ginbutangan sang permanente nga barikada kag wala pa gihapon na-repair.
Gani, padayon ini nga ginagamit sang mga motorista kag ginabalewala ang mga warning signs sa pihak sang risgo.
Sa drone footage nga ginpagwa sang isa ka media outlet, makita nga nagahinay-hinay lamang nga nagatabok ang pila ka mga salakyan sa natiphag nga taytay nga daw kaangay nga naga-agi sa obstale course, tubtob sa makalab-ot ini sa pihak nga bahin.
Suno sa mga residente, mas ginapili sang mga nagamaneho sang salakyan nga mag-risgo apisar mabutang sa katalagman ang kabuhi sangsa mag-agi sa alternatibo nga ruta nga mas nagakinahanglan sang malawig nga oras kag dugang nga gastos sa gatong bangud sa malaba nga biyahe.
