Apektado sa karon ang pagbiyahe sang mga pumuluyo nga nagaistar sa Sitio Pangpang, Barangay Alijis, Valladolid, Negros Occidental matapos maguba kaina sang aga ang taytay nga ila ginalabayan kun magpadulong ukon magpauli nagikan sa town proper.
Sa interview sang Bombo Radyo kay Valladolid Mayor Enrique ‘Bebot’ Miravalles, naglabay sa taytay ang Isuzu wing van nga nagakarga sang 470 ka sako sang feeds nga magadul-ong kuntani sa Vapor Farm sa lugar.
Naglabay ang wing van sa taytay bangud nagpangita ang driver nga si Ramon Oplas sang lisuan.
Bangud 18 ka tonelada lang ang kapasidad sang taytay, nagcollapse ang provincial bridge nga nagalaba sang 10 metros.
Maswerte naman nga wala nahulog sa sapa ang truck kag wala sang nasamaran sa insidente.
Suno kay Miravalles, ginkumpirmar sang Provincial Engineer’s Office nga natalana na gid man nga irepair ang taytay bangud daan na ini.
Santo sa rekord, gintukod ang provincial bridge sang tuig 2005.
Magaubra naman ang banwa sang improvised nga latayan sang mga residente apang indi malabayan sang habal-habal.
Ginalantaw naman nga indi sunado sang driver ang lugar bangud bag-uhanon ini.
