Ginpahayag sang Teacher in Charge sang Kinabong 2 Elementary School sa Brgy Igmaya-an, banwa sang Salvador Benedicto nga wala ini sang may nabaton nga report nga may natabo nga pagpreso sa Grade 6 pupil sa buluthuan.
Sa interview sang Bombo Radyo kay Jireh Turato, sa adlaw nga ginkawat ang wallet sang Grade 3 adviser nga si Ranil Palabrica, sila ang magkaupod nga nagapanyapon.
Suno diri wala man sila sang may ginpasibangdan sa natabo kag wala sang may ginpreso nga bata bangod nga didto man sila nagatinir sa buluthuan.
Dugang pa sini, sadto natabo na nga pagpangransack sa buluthuan kun sa diin ginkawat ang pila ka mga gamit sang mga manunudlo apang ini man ang mga ginbalik kag sadto wala man sila sang may ginpasibangdan.
Ginkwestyon man sini nga kun paano nga gindetain sang Agosto 27 sang tuig 2023 ang bata nga si Fatima bangod nga Dominggo sadto nga adlaw nga wala sang tawo sa buluthuan kag ang balik sang mga manunudlo ang kada Lunes sang kaagahon.
Pahayag ni Turato, ginpatawag na ang pamilya ni Fatima kag si Ranil Palabrica para mag-atubang sa Barangay.
