Dismayado ang Alliance Concerned Teachers (ACT) Negros Occidental sa gin-aprubahan nga Salary Standardization Law of 2019 kahapon.
Ang nasambit nga hagna ang nagapahanugot nga pasakaan ang basic salary sang mga empleyado sang gobyerno.
Sa interview sang Bombo Radyo kay ACT Negros Occidental Chairman Gualberto Dajao, aminado ini nga dismayado sila bangud naglaom ang mga ini nga tumanon ni President Rodrigo Duterte ang iya nga promisa nga malab-ot P10,000 kada bulan ang ipasaka sa sweldo sang mga manunudlo.
Suno sa iya, P1700 lang kada bulan ang nadugang sa ila nga sweldo kag indi ini makaigo sa mga balaklon subong nga tyempo.
Gindugang niya man nga bangud sini, naglapaw na sa P250,000 ang ila nga net income kag taxable na ini gani suno sa iya, daw indi man nila sa gihapon mabatyagan ang increase bangud sa buwis lang ini makadto.
Luwas diri, nagapagwa man sang personal nga kwarta ang mga manunudlo para sa mga kagamitan sa eskwelahan kag pamahaw sang mga estudyante kun may activities.
Aminado man ini nga tuman kanubo ang kalidad sang edukasyon sa pungsod kag isa sa mga rason sini suno sa iya amo ang indi maayo nga compensation sang mga maestra.
