Ginpabalik ang mga teaching kag non-teaching personnel pati ang mga miyembro sang Parent-Teacher Association (PTA) sa mga eskwelahan sa Cadiz City agud magbulig sa clearing operations agud maseguro nga safe na ang mga buluthuan sa pagbalik sang mga kabataan sa Lunes.
Sa interview sang Bombo Radyo Bacolod kay Cadiz City Mayor Salvador “Bading” Escalante, yara na sa 80 tubtob 90 porsyento ang ila clearing operations sa mga nagkalatumba nga puno sang kahoy, magluwas sa mga eskwelahan.
Karun nga wala pa sang klase, ila na nga ginpatawag agud magbalik sa eskwelahan ang parehas nga teaching kag non-teaching personnel kasubong man ang mga PTA members para makabulig sa clearing operations.
Ini man ang rasun kun ngaa gin-extend ang suspension sang klase.
Aminado si Escalante nga may classroom nga natumbahan sang kahoy, kag hingagawon nga ini ang marepair agud kay-o na sa pagresume sang klase sa Lunes.
Nagdeklarar man sang state of calamity ang ciudad agud magamit ang quick response fund sa kaangay nga mga galastuhan.
Suno kay Mayor Escalante, nagpalibot na ini sang instruction sa mga Barangay, nga kuhaan sang litrato ang mga damages, kag lokasyon sang mga ini.
Ang mga evacuees ang nagpala-uli naman, nga ila pa nga ginpabalunan sang mga family food packs, kaangay sang lima ka kilo nga bugas, mga delatas kag iban pa.
Aminado ang alkalde nga kalabanan sa mga naguba nga balay ang hayob-hayob ukon human sa light materials nga wala na ginakatingala.
Suno kay Escalante, madamo sa mga ini ang ginhatatgan na sang offer para sa relocation.
Apang may iban nga nagbatun sang relocation houses sa Yolanda village, apang gin-abandonar man makaligad sang pila ka bulan kag nagabalik sa ila orihinal nga pwesto.
May-ara pa nga ginabaligya ang ila nga mga housing units.
Suno kay Escalante, ginapangita nila ang mga gin-abandonar na agud nga ini ang mahatag pa sa iban nga nagakinahanglan sang balay.
