Ginpahayag sang Focal Person sang Commission on Higher Education (CHED) Region 6 nga may kasugtanan na ang mga ini upod kay Vaccine Czar Calito Galvez Jr kag Health Secretary Francisco Duque III nga malakip sa listahan sang mabakunahan batok sa COVID-19 ang mga college students kasubong man ang teaching and non-teaching personnel sa higher education.
Suno kay Dr. Arnold Anceno, bukas na ang vaccination para sa higher education.
Ginahikot man sang CHED ang mga principal sa mga buluthuan nga makig-angot sa mga banwa kag syudad kun mahimo nga magamit ang mga eskwelahan bilang vaccination site sa pagbakuna sa sektor.
Aminado naman si Anceno nga kalabanan sa mga college students ang yara naman sa 18 anyos pasaka bangod sa K-12 program.
Pahayag sang focal person nga nagalaom ang CHED Region 6 nga makabulig ang rehiyon sa pagpasaka sang porsyento sang mga mabakunahan sa sektor.
Nagasumite naman ang CHED Region 6 sang weekly report natuhoy sa Vaccination apang ginakasubo ni Anceno nga manubo sa gihapon ang roll out ilabi na sa mga buluthuan nga nahamtang sa magagmay nga mga local government units (LGU).
Paathag sang focal person nga kapin 80 porsyento na ang nabakunahan nga teaching and non-teaching personnel kasubong man mga estudyante sa highly urbanized cities kaangay sa Iloilo City kag syudad ang Bacolod apang magamay pa ang turn out gikan sa iban nga LGU.
Target sang CHED nga mabakunahan ang 80 porysento sang sektor agud nga mapatigayon naman ang face-to-face classes ilabi na nga madamo sang mga kurso sa kolehiyo ang nagakinahanglan sang practical trainings.
Sa masunod nga semana, nakaplano naman nga magpatigayon sang school-based vaccination ang duha ka College School sa syudad sang Bacolod.
