Nagpinsar ang alkalde sa banwa sang La Castellana, Negros Occidental nga may naglupok nga bomba matapos ang paglupok sang Bulkan Kanlaon kadungan sang ila nga ginapatigayon nga team building activity.
Sa interview sang Bombo Radyo Bacolod kay La Castellana Municipal Mayor Añejo Nicor, sa 48 ka tuig sini sa banwa, ang paglupok kaina amo ang pinakamabaskog niya nga nabatian nga pagsigabong sang Bulkan.
Apang aminado ini nga yara siya sa Manila para magbatun sang award sang banwa sang matabo ang mas mabaskog nga Moderately Explosive Eruption sang Disyembre 2024.
Suno sa alkalde, matapos sang masobra duha ka tuig nga pag-address sang banwa sa paglupok sang bulkan, ginpakamaayo sini nga mag-organisar sang team building activity sa mga departamento sa idalom sang Municipal Mayor’s Office, agud nga sila ang makasinadya man, maka-bonding, kag makapatigayon sang fellowship.
Apang samtang nagasinadya sa bahin sang Brgy Cabacungan, aminado si Nicor nga siya ang napatumbo gikan sa iya ginapungkuan bangod sa pagsigabong.
Nagpinsar pa ini nga may-ara sang gyera bangod sa pagpinsar nga bomba ang naglupok.
Pahayag sini nga na-utod ang ila kasadyahan, kag sa baylo sila ang nagfocus na lamang sa pag-address sa issue.
Wala naman ini natapos sa panyaga bangod gilayon na ini nga nagcontact sa Disaster Risk Reduction and Management Office kag nagatawag man sa iya ang mga Punong Barangay.
Nagahulat man ini sang abiso sang Philippine Institute of Volcanology and Seismology (PHIVOLCS) kag Office of the Civil Defense (OCD).
Samtang matapos sang pagsigabong, gilayon naman nga ginmando ni Punong Barangay Joselito Martinez sang Brgy Biak-na-bato sa mga Barangay Tanod nga sugaton ang mga mangunguma sa sulod sang 4km Permanent Danger Zone.
Sa paglaragway ni Martinez, kaangay sang goma sang traktura nga naglupok sa iya tupad ang pagsigabong sang Bulkan.
Paathag sini nga apisar ginadumilian ang pagpuyo sa lugar, may mga pananom pa kag kasapatan ang pila ka mga residente.
Gani ginapahanugutan ang mga ini nga makapanguma sa adlaw.
Nagapauli man ang mga ini antes magdulom, apang kaina ginpasugat na niya ang mga mangunguma.
