May-ara sang mga pahanumdom ang Team El Cid kag Team Asenso sa mga botante sa Bacolod City sa besperas sang pagbukas sang campaign period sang mga local candidates.
Nahibaluan nga bwas na Marso 28 ang umpisa sang Local Campaign Period para sa mga nagapapili bilang Kongresista, Gobernador, Alkalde kag mga Konsehal.
Sa mensahe ni Mayoral aspirant Vice Mayor El Cid Familaran, dapat nga pamatian ang mga programa kag achievements sang mga National kag Local candidates.
“Vote Wisely” ang pahanumdom sang bise alkalde bangod suno diri, apisar nga isa ka adlaw lamang ang eleksyon, tatlo ka tuig pa ang hulaton antes liwat makapili sang opisyales.
Ang campaign kickoff sang Team El Cid ang patigayunon, rain or shine alas-3:00 bwas sa hapon sa Bacolod City Public Plaza.
Maykaangtanan sa Operation Baklas sang Commission on Election, ginpasalig ni Familiaran nga siya ang wala hilimuson bangod umpisa pa lamang ini ang iya na ginpahanumdom sa iya supporters.
Pasalig sini nga wala sang makita nga posters ukon tarpaulins ni Familiaran sa mga poste, kahoy kag mga indi designated posting areas.
Sa baylo ang mga campaign materials sini ang yara lamang sa mga pribado nga propidad kun may supporters nga magarequest.
Sa pihak nga bahin, ang campaign kickoff sang Team Asenso ang inisyal nga patigayunon alas-6:00 bwas sa gab-i sa Paglaom Sports Complex.
Nagalaom si Congressional aspirant Bacolod City Mayor Alfredo “Albee” Benitez nga magadangat sa libo ang magatambong sa aktibidad.
Suno diri, mahimo pa nga magbag-o ang plano bangod sa ulihi sini nga pagtsekyar, 30 porsyento ang tyansa nga maga-ulan bwas bangod sa Low Pressure Area.
Kun ma-alang alang mahimo nga ireschedule na lamang ang campaign kickoff sa iban nga petsa.
Samtang pahanumdom naman sang alkalde sa mga botante nga isa lamang ka adlaw ang eleksyon, kag dapat respetuhon kun sin-o ang pilion sang tawo.
