Aminado ang isa ka team leader sang RGS World Marketing Corporation nga may yara gid man sila sang lapses kun kaisa kun sa diin indi nila mapresentar sang husto sa mga miyembro ang marketing pattern sang kompaniya.
Sa interview sang Bombo Radyo Bacolod sa isa sa mga team leader nga nag-ayo nga indi paghingadlan, gin-athag sini nga wala sang pag-inintuanay nga nagakatabo sa ila apang ang problema kun kaisa amo ang misrepresentation sang marketing pattern sang RGS World Marketing Corporation.
Nahibaluan nga sa gin-invest nga P1,000 sang isa ka miyembro, makabaton ini sang P3,500 nga incentive bonus kag sa nag-invest sang P5,000 makabaton naman ini sang P17,500.
Sa P1,000 nga ibayad sang isa ka tawo, makabaton ini sang apat ka bars sang habon nga may SRP nga P180 kag sarang nila ini mabaligya sa presyo nga P250.
Suno sa team leader, may yara sila sang mga sub-leaders nga nagapang-invite sang iban pa nga mga miyembro.
Possible nga indi sang mga ini mapaathag sang husto sa mga bag-o nga miyembro kun ano ang dalagan sang ila negosyo gani may yara sang mga nagareklamo.
Gina-engganyo sini ang mga miyembro nga magpadulong lang sa main office sang RGS World Marketing Corporation agud nga maathagan.
