Ginkumpirmar sang pinuno sang inter-agency task force against coronavirus sang Bacolod City nga magapatigayon sang pagsinapol ang mga opisyales sang ciudad subong nga adlaw kaupod sanday Presidential Assistant for the Visayas Secretary Michael Lloyd Dino, Environment Secretary Roy Cimatu, Visayas Deputy Implementer Gen. Melchiades Feliciano kag OPAV’s Asec. Anthony Gerard “Jonji” Gonzales nga ginpadala ni Presidente Rodrigo Duterte bilang sabat sa hingyo ni Mayor Evelio “Bing” Leonardia.
Madumduman nga nagpadala ang alkalde sang emergency kag urgent appeal kay Presidente Rodrigo Duterte nga nagahingyo nga magpadala sang augmentation team nga ginalakipan sang 150 ka mga nurses, 20 ka mga doktor kag 30 ka mga medical technologist nagikan sa Department of Health para sa Bacolod City bilang “emergency stop-gap measure” antes pa man ma-bag down ang health care system sang ciudad bangud sa coronavirus pandemic.
Sa interview sang Bombo Radyo kay Vice Mayor El Cid Familiaran, ginkumpirmar sini nga nag-abot na sanday Cimatu sa ciudad kagapon kag karun nga adlaw, magapatigayon sila sang pagsinapol agud istoryahan kun ano ang sahi sang bulig nga kinahanglan sang ciudad.
Suno kay Familiaran, mangayo sanday Cimatu ang situationer sang kaso sang COVID-19 sa Bacolod kag mahatag sang mga suhestiyon kun anu nga mga tikang ang himuon.
Nag-abiso man ini sa mga pumuluyo nga hulaton lang nga magpagwa sang executive order si Mayor Bing kun duha ukon apat ka adlaw gid man ang lockdown sa ciudad.
Apisar sini suno kay Familiaran, kinahanglan nga magpreparar na nga daan ang mga pumuluyo kag magpangumpra sang kinahanglanon agud indi na magsala.
Nagpahandumdum man ini nga kun wala man lang sang importante nga kadtuan, likawan na lang anay ang pagwa sa puluy-an.
