Ginpahayag ni Presidential Assistant for the Visayas Michael Lloyd Dino nga may yara sang formula agud mapunggan ang padayon nga pagsaka nga kaso sang coronavirus disease sa Bacolod City.
Sa ginpatigayon nga pagsinapol ni Department of Environment and Natural Resources Secretary Roy Cimatu, Presidential Assistant for the Visayas Michael Lloyd Dino, RIATF-Visayas deputy chief implementer Gen. Melquiades Feliciano, DOH-7 regional director Jaime Bernadas, Mayor Evelio “Bing” Leonardia kag pila ka mga opisyales, ila gin-assess ang sitwasyon sang COVID-19 sa ciudad kag kun ano nga immediate assistance ang mahatag sang national government sa Bacolod agud malikawan ang paglapta sang virus.
Suno kay Dino, may yara na sang formula para sa nagasaka nga kaso sa ciudad kag apisar nga indi man ini makabig nga perpekto para sa nagakatabo nga pandemic, may yara sila sang maayo nga plano para sa Bacolod.
Suno sa iya, may yara sang mga military health workers, military doctors, kag military nurses nga magaabot subong nga adlaw.
Gindugang man sini nga duha ka team ang maabot nga ginalakipan sang 12 ka mga miyembro sa una nga batch.
Suno naman kay Cimatu, ang formula nga ila gingamit sa Cebu amu ang itugyan sa kada barangay ang pagpakigbato sa virus sa pagpamuno sang mga punong barangay.
Suno sa iya, ang average case sa Bacolod kada adlaw ang yara sa 30 samtang sadto sa Cebu, yara sa 350 ka mga kaso.
Sa karun suno diri, nagadangat na lang sa 10 tubtob 15 ang mga kaso kada adlaw sa Cebu.
Gani, kampante ini nga mas mahapos mapanubo ang kaso sa Bacolod sa bulig kag kooperasyon sang mga pumuluyo.
Ginpahayag naman ni Feliciano nga magapadulong sila anay sa Cebu kag magabalik sa Bacolod sa Martes kun sa diin mangin full time na sila sa ciudad subong man sa Iloilo.
Nagapasalamat naman si Leonardia sa Presidente sa gilayon nga pagrespondi sa iya nga hingyo kag pagpadala sang dako nga bulig sa Bacolod.
Suno sa iya, antes pa maglala ang sitwasyon sa ciudad, kinahanglan na ini tapnaon.
Gani, ginawelcome gid sini ang grupo nga ginpadala sang president bangud nagapati ini nga may yara sila sang expertise nga makabulig sa ciudad.
