BACOLOD CITY–May apat na ka bulawan nga medalya ang natipon sang Team Philippines sa nagapadayon nga 10th ASEAN School Games nga ginapatigayon sa Bukit Jalil National Stadium sa Kuala Lumpur, Malaysia.
Suno kay Coach Addy Arca sang Romanito Maravilla National High School sa ciudad sang Bacolod, nakuha sang Pilipinas ang gold medals sa high jump girls paagi kay Evangelene Caminong nga may 1.74 meters kag long jump girls paagi kay Trexie Dela Torre nga may 5.84 meters.
Nakuha man sang pungsod ang bulawan nga medalya sa javelin throw kag 400-meter dash paagi kay Jessel Lumapas samtang bronze medal naman sa 4×100-meter relay.
Suno kay Arca, nabreak sang Pilipinas ang record sa javelin throw paagi sa 49.18 meters nga haboy ni Ann Katherine Quitoy sang RMNHS.
Nahibaluan nga anom ka atleta sang Pilipinas ang nagikan sa Region 6 nga ginalakipan sang lima sa RMNHS, isa halin sa Bacolod Tay Tung High School kag isa man sa Iloilo.
Ang mga atleta ang gold medalists sa ginpatigayon nga Palarong Pambansa 2018.
Suno kay Arca, indi mahapos ang ila hampang bangud ang iban nga mga kasumpong ang nakahampang na sa Southeast Asian Games.
