Amat amat na nga ginahitso ang mga team nga makasulod sa Round of 32 sang FIFA World Cup 2026.
Kahapon, una na nga nasemento sang Mexico kag South Africa ang ila nga spot para sa Group A matapos mangin Top 2 sa group rankings.
Ang Switzerland kag Canada naman ang nakakuha sang Top 2 spot sa Group B.
Samtang ang Brazil kag Morocco ang nakakuha sang Top 2 spot sa Group C.
Ang South Korea sa Group A, Bosnia and Herzegovina sa Group B, kag Scotland sa Group C ang kalakip pa sa pilian nga mahimo makasulod sa Round of 32.
Nahibaluan nga luwas sa 24 ka Top 2 teams, magakuha sang best of rank 3 teams gikan sa 12 ka grupo agud makumpleto ang Round of 32.
Samtang nataktak na ang Czechia, Qatar, kag Haiti.
Subong nga aga, nadaog naman sang Cote d’Ivoire ang Curacao sa score nga 2-0 samtang ginlutos naman sang Ecuador ang Germany sa score nga 2-1 para sa Group E.
Sa Group F, nagpatas naman ang Japan kag Sweden sa 1-1, samtang ang Netherlands ang nakadaog batok sa Tunisia sa score nga 3-1.
Bangod sini, ang Germany kag Cote d’Ivoire nga amo ang Top 2 sa Group E ang may segurado na nga spot sa Round of 32; kasubong man ang Netherlands kag Japan para sa Group F.
Nakuha naman sang Ecuador ang 3rd spot para sa Group E, kag Sweden sa Group F para sa tyansa nga makabahin sa Round of 32.
Apang nataktak na ang Curacao kag Tunisia.
May natalana pa nga hampang para sa Group D alas-10:00 subong nga aga sa tunga sang Turkiye kag USA, kasubong man sang Paraguay kag Australia.
