Ginalauman nga mapirmahan na sini nga bulan sang Agosto ang implementing rules and regulations sang layi sang Negros Island Region.
Sa interview sang Bombo Radyo Bacolod kay Bacolod City Lone District Congressman Greg Gasataya, kahapon sa ginpatigayon nga first meeting sang Technical Working Group sang NIR, gindiskusyonan nga Agosto 19 tubtob 23 ang tentative nga petsa nga mapirmahan ang IRR.
Suno diri, matapos ang IRR signing amo naman ang pagplano sang road map sang NIR para mangin basehan sang pagpatukod sang mga regional offices sa Negros Occidental, Negros Oriental ukon sa Siquijor man.
Samtang, suno kay Siquijor Governor Jake Vincent Villa kun wala lang man sang may ibutang nga satellite offices sa Siquijor, indi na lamang sila mag-upod sa NIR.
Ginalauman naman nga sa masunod nga tuig indi lamang transitional offices ang natukod apang ini ang mangin regional office na gid.
Nagpasalig man ini nga maiduso nga mahatagan sang budget ang NIR sa 2025 nga bisan 25 percent lamang sang mga personnel ang mabutang sa pag-operate sang regional offices.
