Kun kaisa ang isa ka tawo ang nagahimo sang butang bangud akig ini.
Kaangay lamang sa Amerika, isa ka teenager ang napriso sang walo ka bulan matapos nga natukiban ang pagreport sini sang peke nga bomb threat sa isa ka cruise ship sa rason nga mapunggan sini ang iya nga nobya nga makapadayon sa pagbiyahe nga wala siya.
Sang Enero, pila ka minutos matapos nagbiya ang Carnival Sunrise cruise ship sa Miami, Florida, padulong sa Jamaica, nakabaton ang nasambit nga Cruise Lines sang email nga nagapahayag nga may bomba diri.
Gilayon nga nagpatigayon sang dako nga operasyon ang US kag Jamaican Coast Guard kag maid-id nga gin-usisa ang masobra isa ka libo nga kwarto.
Pagkatapos sang pila ka oras nga delay, nagpadayon ang Sunshine padulong sa Caribbean.
Natigayon nga ma-trace sang otoridad ang email sa isa ka 19 anyos nga lalaki sa Michigan nga sang ulihi, nag-ako nga nag-report sang peke nga bomb threat bangud luyag sini nga mapunggan ang iya nobya kag pamilya sini nga magpadulong sa cruise nga wala siya.
Suno kay Joshua Darrell Lowe II, nag-book sang ticket ang iya nobya kag pamilya sini kag ginbilin sa iya ang ila mga hinuptanan nga sapat nga amo ang rason sang iya nga kaakig.
Una ini nga ginsentensyahan sang lima ka tuig nga pagkapriso apang sini lang nga bulan, ginsentensyahan siya ni U.S. District Judge Paul Maloney sang walo lang ka bulan nga pagpriso.
