Masobra 3,700 ka mga teenagers sa Negros Occidental ang nagbusong sang tuig 2020 sa pihak sang lockdown bangud sa COVID-19 pandemic.
Sa interview sang Bombo Radyo kay Lily Grace Nisnisan, focal person sang Adolescent Health and Development Program sang Population and Development Division, 47 ka mga babayi nga nagaedad 10 tubtub 14 ang nagbusong tinalikdan nga tuig.
Samtang ang mga nagaedad naman sang 15 tubtub 19 nga nagbusong ang nagdangat sa 3,655.
Sa kabug-usan, nagdangat sa 3,702 teenage pregnancies ang narekord sa probinsya ukon katumbas sang 13.21 percent sang total pregnant women sa Negros Occidental tinalikdan nga tuig.
Suno kay Nisnisan, Silay City ang may highest number of teenage pregnancies sa mga kaciudaran nga nagadangat sa 329 samtang La Castellana naman sa mga kabanwahanan nga nagadangat sa 177.
Pinakahuben nga nagbusong tinalikdan nga tuig ang nagaedad sang 12.
Suno kay Nisnisan, nagnubo ang teenage pregnancies kun ipaanggid sang 2019 nga nagdangat sa 5,873 apang wala indi gihapon ini maayo bangud madamo gihapon ang 3,702.
Ang mga teenagers nga nagbusong suno kay Nisnisan ang kabahin sang poorest of the poor families.
Bangud sini, todo ang education campaign sang PopDev agud mapanubo ang teenage pregnancies.
Nagpanawagan man ini sa mga ginikanan nga giyahan sang maayo ang mga kabataan.
Ang kalabanan nga rason sang teenage pregnancies amo ang curiosity, lack of information, kakulang sang parental guidance, nabiktima sang pagpang-abuso sexual, kag iresponsable nga paggamit sang social media.
