Ginapanawagan sa mga pumuluyo nga bisitahan kag suportahan ang pagsaylo sang mga Manokan Country vendors sa Temporaryo Manokan sa kilid sang SM City Bacolod.
Sa interview sang Bombo Radyo Bacolod kay Councilor Celia Flor, chairperson sang Committee on Markets sa Sangguniang Panlungsod, sumugod subong nga adlaw, makaumpisa na sa pagbaligya sa temporary location ang mga tenants sa north portion sang mall.
Kahapon, amat-amat na nga nagplastar ang mga tenants, naghamtang sang mga lamesa kag bangko kag nagtsekyar sang grillers para sa pag-ihaw.
Ini bangod Pebrero 5, magasugod na sa pagboard up ang SM Prime Holdings Inc. para sa patigayunon nga development kun sa diin nalakip ang Manokan Country.
Ginalantaw nga magatinir ang mga tenants sa Temporary Manokan sa sulod sang 14 ka bulan ukon tubtob nga mahuman na kag available na nga masudlan ang bag-o nga Manokan Country.
Aminado si Flor nga magamay ang space sang kada stall, gani ang ciudad ang magahamtang sang tents sa Ferrero Street nga magaserbe extension.
Ang tent ang hamtangan man sang mga tables kag pulungkuan agud protektado ang mga customers hikan sa ulan ukon init.
Nagalaom si Flor nga mangin tayuyon na ang negosyo sang mga Manokan vendors kag sila ang tultulon gihapon sang mga pumuluyo.
Panawagan sini nga suportahan ang lokal nga mga negosyante kag sila ang bisitahan agud makabawi man sa income, ilabi na nga isa sa ila nga ginakahangaw-an amo ang madutay nga customers bangod mas naandan na sang mga tawo ang orihinal nga pwesto.
Libre naman sa renta ang mga tenants samtang yara sa Temporary Manokan kag ang kuryente kag tubig na lamang ang bayaran.
Natalana naman nga irelease ang P20,000 nga financial assistance sang ciudad sa tagsa ka tenants.
Ang mga tenants ang nagkontrata naman sa pagtukod sang roll-ups bilang dugang nga seguridad magluwas sa ihamtang nga security personnel sa area.
