Ginalantaw ni Bacolod City Mayor Alfredo “Albee” Benitez nga isaylo na lamang sang permanente ang pagbaligya sa Burgos Public Market sa propidad sang Yanson Family sa Barangay 19, sangsa ini ang temporaryo lamang bangod sa natalana kuntani nga renovation sa idalum sang Public Private Partnership (PPP).
Nahibaluan nga sa P4.4 billion loan sang Bacolod City Government sa Development Bank of the Philippines (DBP), P525 million diri ang natalana para sa renovation sang Burgos Public Market.
Samtang sa una nga plano, temporaryo nga isaylo ang mga market vendors sa propedad sang Yanson Family samtang nagapadayun ang construction, kag ang budget para sa pagplastar sang bag-o nga pwesto ang nagadangat sa balor P160 million.
Magluwas sa P160 million, may-ara pa sang P2 million nga monthly rent.
Apang, imbes nga maggasto sang nasambitan nga kantidad sa temporaryo nga pagsaylo, ginalantaw sang alkalde nga mangin permanente na lamang ang pwesto pinaagi sa Public Private Partnership sa Yanson Family.
Samtang mahimo naman nga gamitun bilang expansion ukon bagsakan ang orihinal nga Burgos Public Market.
Paathag ni Benitez nga sa Public Private Partnership, ang duta ang magagikan sa Yanson Family samtang ang Bacolod City Government naman ang magatukod sang building.
Ukon mahimo man nga magswap sang propedad kun magapahanugot ang Yanson Family.
