Ginaduso sa Kamara ang temporaryo nga pagsuspender sa pagbayad sang loan sang mga tsuper kag mga operator agud mabuhinan ang ila palas-anon sa epekto sang krisis sa langis.
Sa ginpatigayon nga LEAD hearing kahapon, ginpahayag sang Landbank kag Bankers Association of the Philippines (BAP) nga handa sila nga tun-an ang hingyo nga moratorium kaangay sang ginpatuman sang nagkapandemya.
Ang proposal ang naghalin kay Quezon City Representative Franz Pumaren, chairperson sang House Committee on Transportation, matapos nangayo sang bulig sa iya ang nagkalain-lain nga mga grupo sang bus, jeepney, kag mga hauler ukon trucker.
Suno kay Pumaren, nabudlayan na ang mga operator sa pagbayad sang ila mga loan kag mga penalty bangud sa kagamay sang ila nga gina-ganar kada adlaw tuga sang sobra ka mahal nga presyo sang gatong.
Nagpasalig naman si Eden Japitana sang Landbank nga gina-amyendar na nila ang ila nga “CARES Plus” program agud malakip ang nasambit nga krisis sa ila nga relief facilities.
Apang, ginpaathag niya nga kinahanglan nila sang suporta gikan sa Bangko Sentral ng Pilipinas (BSP) bangud may mga reglamentaryo nga kinahanglan nila sundon bilang mga regulated institutions.
Nagpabutyag man sang pag-ugyon ang mga private banking sectors kun sa diin ginpahayag ni Arnel Almaden sang BAP nga bukas sila sa koordinasyon sa BSP agud makahimo sang husto nga mekanismo para sa deferment sang pagpanukot.
