Ginakalipay sang Alliance of Concerned Teachers Bacolod ang pahayag sang Department of Education nga temprano pa ihatag ang P5,000 cash allowance para sa mga manunudlo.
Kahapon ginmando ni Education Secretary Leonor Magtolis Briones ang pagpanagtag sang Php 5,000 cash allowance sa mga manunudlo antes mag-umpisa ang school year 2021-2022.
Suno sa Joint Circular No. 2 s. 2021 sang DepEd kag sang Department of Budget and Management (DBM), ginapahanugutan ang Education Secretary nga ini ang magtalana sang mas temprano nga schedule sang pagpanagtag sang cash allowance nga sa karun ang nagsaka na nagikan sa P3500 sang nakaligad nga tuig.
Kaangay sang nakasaad sa budget law para sa 2021 ang P5,000 cash allowance ang nakapain sa pagbakal sang mga supplies kag materyales sa pagtudlo nga makaptan ukon indi makaptan, agud magpatigayon sang nagkalain-lain nga sahi sang pagtuon kaangay sang internet kag iban pa nga galastuhan sa komunikasyon, kasubong man para sa ila tuigan nga galastusan sa medical check-up.
Sa interview sang Bombo Radyo Bacolod kay ACT Bacolod president Josenito Makilan, aminado ini nga madugay na nila ginahulat ang temprano nga paghatag sang cash allowance.
Ginakalipay sini ang effort sang education secretary nga mabuhinan ang kabudlayan sang mga manunudlo kag mabayaran man ang ila pagpangabudlay sa pag-atubang sang mga pagpanghangkat ilabi na sa karun nga may pandemya.
Ginpahayag man ni Makilan nga makabulig gid ang cash assistance bangud sa bilog nga tuig, sila ang nagapanabon sang mga kinahanglanon sa pagtudlo sa mga estudyante.
Makabulig man ang cash assistance nga mabuhinan ang kabug-at sang mga manunudlo sa paggasto sa pagbakal sang load agud makatudlo online kasubong man sa pagprint sang mga modules agud ihatag sa mga estudyante.
