Nagapati ang boarder sang balay nga gina-alegar ginhalinan sang kalayo sa nagluntad nga sunog sa Purok Katilingban 1, Brgy 39, Bacolod City, nga gikan sa iban nga balay ang kalayo.
Sa interview sang Bombo Radyo Bacolod kay Alyas Jona, ginhambalan lang ini sang isa pa ka boarder nga ginsulod na sang kalayo ang ila nga boarding house.
Suno diri, ang kwarto nga ginatudlo nga ginhalinan sang kalayo ang nagaserbe na lamang nga bodega sang mga gamit nga nabilin sang mga sadto boarders, nga wala sang linya sang kuryente.
Basi sa nakita sini, ang kalayo ang nagikan sa tabok nga dingding antes nagsulod sa kwarto, gani nagapati ini nga sa gwa nag-umpisa ang sunog.
Pahayag ni Jona nga yara sa trabaho ang iya bana gani duha lamang sila sang iya anom ka bulan nga bata sa kwarto.
Ang ila subang nga tatlo ka tuig ang yara naman sa iya iloy.
Suno kay Jona, ginhingagaw sini himos ang mga importante nga dokumento kag ginpanghaboy ang mga panapton sang bata sa bintana.
Aminado ini nga nabudlayan pa sila sa paggwa bangod yara sa ikaduha nga panalgan kag madasig nga naglapta ang kalayo.
Suno diri, wala gid ini nakadala sang gatas kag beberon sang ila nga baby.
Sa karun, wala ini nakahibalo kun ano ang ila nga himuon kag kun sa diin sila magasaylo.
