Ginalantaw sang konsehal kag abogado sa ciudad sang Bacolod nga politika gihapon ang sa likod sang pagduso sang hagna nga pagpalawig sang term of office sang mga Punong Barangay sa anom ka tuig.
Sa interview sang Bombo Radyo Bacolod kay Councilor Atty Renecito Novero, aminado ini nga may bentaha kag disbentaha sa pagpalawig sang termino sang mga Punong Barangay.
Suno sa konsehal, ang pagpalawig sang termino ang makabulig para sa mga opisyal nga may mga programa pa nga luyag padayun sa ila nga Barangay.
Apang makaluluoy naman ang mga constituents inkaso nga ang Punong Barangay ang wala nagaperform sang maayo kag madamo sang mga indi nagakaigo nga mga pagpatuman
Aminado man si Novero nga malip-ot ang tatlo ka tuig, apang tama naman ka lawig sang anom ka tuig.
Suno diri, kun luyag gid nga mapalawig sang anom ka tuig ang termino, dapat mabutang sa layi nga sila ang indi na pwede makapare-elect sa kaangay nga pwesto matapos ang anom ka tuig.
Samtang dapat magbutang man sang maathag kag mahapos nga pamaagi sa pagpahalin sa mga indi kwalipikado nga opisyal agud indi na maglawig ang pag-antos sang mga pumuluyo.
Sa pihak sini, gindumdom ni Novero nga sadto apat ka tuig ang termino sang mga Barangay Officials, apang ginpanubo sa tatlo bangod sa kahangawa nga ini ang makatuga sang political dynasty.
Apang yara gihapon ang political dynasty kag wala man nakita ni Novero nga may kongresista ukon senador nga sensero nga magpasar ang anti-political dynasty law.
Nagapati ini nga para gihapon sa nagahilapit nga 2025 Mid Term Elections ang ginaduso nga term extensions agud nga mangin mahamot ang mga ini kag makaangkon sang suporta gikan sa mga local officials.
