Ginaplantsa pa ang terms of reference para sa koleksyon sang basura sa ciudad sang Bacolod agud mapatigayon ang bidding kun sa diin igadeterminar ang masunod nga private garbage hauler.
Suno kay Mayor Alfredo Benitez, inisyatibo sang Department of Public Services nga siguruhon nga makalagas sa koleksyon sang holidays kag matipon ang wala nakolekta.
Suno diri, gintawag niya ang atensyon sang DPS bangud reactionary ang city government kun sa diin kinahanglan pa nga may matawag agud nga makolekta ang ila basura.
Panindugan sang alkalde, dapat nga proactive ang koleksyon sang basura kag indi na paghulaton nga may mapalab-ot sang concern agud nga uncollected garbage bangud kinahanglan nga kolektahon ang kutob sang mga basura.
Sa karon, ginatapos na ang terms of reference para sa garbage collection kag ginalauman nga mapagwa na sa ulihi nga semana sang Enero ukon una nga semana sang Pebrero para sa bidding sang bag-o nga garbage collector.
Suno diri, importante ang kondisyon sa karon bangud ang arrangement sa garbage hauler amo ang fixed fee sa ila nga mahakot – gamay man ukon madamo.
Bangud sini, isa sa ginakonsiderar sa karon amo ang pagbayad sa hauler depende sa volume sang ila mahakot agud dako man ang ila income kun madamo ang ila nahakot.
Sa sini nga paagi suno sa alkalde, mangin commensurate na ang bayad sa ila sangsa fixed ang fee sa paghakot sang tanan nga basura.
Ikonsiderar man ang performance sang naglabay nga garbage hauler sa pagdeterminar kun iaward sa ila ang kontrata santo sa resulta sang bidding.
Sa karon, padayon ang pagconstruct sang sementado nga dalan padulong sa sanitary landfill apang kinahanglan pa ang engineering solution sa overflow.
