Ginatarget sang provincial government sang Negros Occidental nga magadangat sa 2,000 tubtob 2,400 ang testing capacity sang machine sa Teresita Lopez Jalandoni Provincial Hospital Molecular Laboratory.
Suno kay Provincial Administrator Atty. Rayfrando Diaz, dapat nalang nga ipangamuyo nga mangin OK ang pagbasa sang resulta kag indi mabogdown ang mga makina.
Agud naman nga wala sang kabalak-an, naghanda na si Governor Eugenio Jose Lacson sang standby nga machine engkaso maguba ang ginagamit.
Ini agud nga malikawan ang kaangay nga insidente sa Iloilo kun sa diin sang naguba ang machine, ginkinahanglan pa nga hulaton kun san-o ini nga makay-o.
Ginalantaw naman nga maayo nga balita kun makasugod na sa pag-operate ang molecular laboratory nga gintukod sa Valladolid District Hospital.
May nakahanda naman ang probinsya nga sunod nga pagatakdan sang ikatatlo nga molecular laboratory.
Agud mapasanyog naman ang bed capacity sa pagbaton sang pasyente, ang 29 nga bed capacity sa Cadiz City District Hospital ang pagahimuon 110 kag 106 ka mga bed capacities gikan naman sa iban nga mga ospital sa probinsya.
Ini nga tikang agud nga malikawan ang paglibot-libot sang mga ambulansya sa pagpangita sang bakante nga ospital nga sarang mangin kabangdanan sang kamatayon sang pasyente.
