“Testingan niya eh.” Ini ang sabat ni Bacolod City Councilor Al Victor Espino sa post sa social media sang isa ka transport group leader.
Ang nagpost amo si Wareen Jayson Gangoso, chairman sang Negros and Panay United nga nagapangabay sang paghinun-anon sa konsehal kag sa alkalde sang ciudad sang Bacolod antes ang operasyon batok sa unconsolidated jeepneys.
Sa interview kay Espino wala pa ang opisina sini nakabaton sang sulat nagikan sa nasambit nga transport leader.
Suno kay Espino, magakitaay man sila bisan diin sang transport leader kag lantawon gid sini kun ano ang mahimo sini sa konsehal.
Dugang pa sini sa post ni Gangoso, daw kaangay nga ginapahog sini ang konsehal kalakip na si Bacolod City Mayor Alfredo “Albee” Benitez kag ang LGU mismo.
Gin-athag man sini nga sa February 15 magatakop na ang Business Permits and Licensing Office sang ciudad kun sa diin nagahatag sang permits sa mga negosyo kalakip na sa transport apang indi makakuha ang mga transport sang permits kun wala sang prangkisa nagikan sa Land Transportation Franchising and Regulatory Board (LTFRB).
Suno sa konsehal, indi ang BTAO ang magaoperate sang mga wala prangkisa kundi ang LTFRB kag wala sang business permit, ang magaoperate ang City Legal Office.
