Nagdesisyon ang Thailand Government kag Ministry of Education nga hugton na lamang ang pagtsekyar sa kondisyon sang mga buses nga ginagamit sa field trips sa baylo nga ini ang i-ban.
Ini kasunod sang pagka-aksidente sang school bus sa suburban Bangkok nga nagpatay sang 23 kalakip ang tatlo ka manunudlo.
Sakay sa school bus ang 39 ka mga kabataan gikan sa primary kag junior high school para kuntani magfield trip apang hinali nga naglupok ang royda sang bus tubtob nga nagbunggo sa barrier kag gindakop sang kalayo.
Sa interview sang Bombo Radyo Bacolod kay Lady Ninah Cioco, Bombo International News Correspondent derekta sa Thailand, siya ang pito ka tuig na nga nagtudlo sa primary school sa Thailand, kag ini ang makapamatuod nga tumalagsahon lamang ang kaangay nga aksidente.
Tuman naman ang kalisod sang bilog nga Filipino teachers nga yara sa Thailand, ilabi na nga normal na sa mga manunudlo nga Pilipino ang tuman nga pagtipig sa ila mga estudyante.
Aminado si Cioco nga mandatory para sa mga buluthuan ang pagpatigayon sang field trips bangod ini ang makahatag sang dugang nga experience kag impormasyon sa mga kabataan.
Apang bangod sa insidente, madamo nga mga ginikanan ang nagpanawagan nga i-ban ang mga speed bus kasubong man ang mga field trips.// Panindugan sini nga ang nasambitan nga sahi sang bus ang masami ginagamit sa field trips bangod sa mga features sini nga nagahatag dugang nga kasadya sa mga kabataan.
Bangod sini, nadesisyunan nga pasanyugon na lamang ang pagtsekyar sa kondisyon sang mga buses antes gamiton sa mga field trips.
Sa pihak nga bahin, ang Thailand government ang nagpasalig naman nga sila ang magahatag sang financial kag burial assistance sa mga nalisdan, kasubong man sa medical expenses sang mga nasamaran.
