Indi makapati ang nursing graduate sang Colegio San Agustin-Bacolod, nga mangin Rank 5 siya sa 2026 Philippine Nursing Licensure Examination.
Si Therese Erika Gomez nga tumandok sa ciudad sang Bacolod ang nakakuha sang 91.40% rating.
Sa interview sang Bombo Radyo kay Gomez, wala niya mapunggan nga maghibi sa iya iloy sang nakita niya ang iya pangalan topnotcher list.
Para sa iya, isa ini ka answered prayer matapos ang pila ka semana nga paghulat kag pagpaminsar.
Aminado si Gomez nga may pila ka question sa board examination nga indi siya sigurodo sa iya mga answer.
May pressure man siya nga nagakabatyagan bangud consistent achiever siya sa eskwelahan.
Halin Grade 1 tubtob kolehiyo, sa Colegio San Agustin-Bacolod siya nag-eskwela kag nagradwar nga valedictorian sa elemetarya kag highschool.
Nangin Top 3 Most Outstanding Student man siya sang Senior High School kag sang kolehiyo, nagtapos bilang summa cum laude.
Sa pihak sini, aminado si Gomez nga indi siya consistent sa pagtuon kag madasig siya nga madistract.
Nahibaluan nga isa man ka nurse ang iloy ni Gomez kasubong man ang ang iya mga tiya kag tiyo.
Sa first year college, aminado siya nga indi pa gid niya ma-appreciate ang kurso nga nursing.
Nagbag-o ini sang nag 2nd year siya, sang nagdalom ang iya exposure sa clinical education kun sa diin makita niya mismo sa ospital ang matuod nga responsibilidad sang isa ka nurse.
Sa pihak nga bahin, ginpahayag ni Gomez nga wala nangin distraction ang iya nga lovelife.
Sa baylo, suno sa iya, nangin motivation niya ini sa pagtuon.
Proud si Gomez sa iya boyfriend nga iya man classmate nga nangin supportive sa ila nga journey bilang mga nursing student.
Matapos ang kadalag-an, luyag sini nga mag clinical experience sa Pilipinas.
Bukas man siya sa anuman nga oportunidad nga mag-abot sa iya.
Isa sa iya handum nga mapaambit ang iya mga natun-an bilang nursing student sa mga estuyante nga luyag man mangin nurse.
Bangud nagapati si Gomez nga may rason kun ngaa nalab-ot niya ang iya ng achievement subong kag luyag niya gamiton ang iya sugilanon agud ma-inspire ang iban.
