Ginahulat pa sang city government sang Bacolod ang desisyon sang Department of the Interior and Local Government kun pahanugutan ang pagbalik sang mga sidewalk vendors nga ginbutang sa vendors’ plaza sa ila orihinal nga pwesto.
Ini matapos naghingyo ang mga sidewalk vendors kay Bacolod City Mayor Evelio “Bing” Leonardia nga pahanugutan sila nga magbaligya sa ila ginhalinan sa downtown area subong nga nagahilapit ang holiday season.
Sa interview sang Bombo Radyo kay Bacolod City Legal Officer Atty. Joselito Bayatan, ginpahayag sini nga ginahulat pa sang city government ang desisyon sang DILG sa ila ginpadala nga sulat nga pahanugutan ang mga sidewalk vendors nga magbalik sa downtown area sa nagahilapit nga paskwa.
Suno kay Bayatan, padayon nila nga gina-implementar ang mando sang DILG nga hawanan ang downtown area sa mga sidewalk vendors kag may yara man sang mga pulis nga nagamonitor kag nagahatag sang disciplinary measures.
Apang sa nagahilapit nga holiday season, naghingyo ang mga sidewalk vendors nga mabalik sila sa sang una nila nga ginabaligyaan gani nagsulat ang city government sa DILG agud makuha ang ila nga opinyon.
Suno kay Bayatan, hulaton nila ang balos sang DILG apang kun indi ini magpasugot, wala na sila sang may mahimo.
