Ginpahayag sang alkalde sa banwa sang La Castellana nga ang Bailes de Luces ang nangin liyabi agud matukuran sang tatlo ka panalgan nga police station ang banwa.
Sang Marso 25, ginpatigayon ang inauguration kag blessing sang 3-storey La Castellana Municipal Police Station.
Sa interview sang Bombo Radyo Bacolod kay Mayor Rhummyla Nicor Mangilimutan, ginakalipay gid sini nga nahatagan na sang standard model nga police station ang banwa.
Suno diri, 2019 palang sang gindonar ang duta nga gintukuran sang pasilidad kag ang building ang may budget nga P10 million.
Ginsaysay sini nga nagperform sadto ang Bayles de Luces sa aktibidad sang Police Regional Office 6 kag nahinambit sini nga siya ang anay pulis gani gin-imbetar ini nga mangin speaker sa ila aktibidad sa Camp Crame sang 2022 kun sa diin nagperform man ang Bailes de Luces.
Samtang nagadiskusyon nahinambit sini nga wala pa sang standard nga police station ang La Castellana.
Matapos sini, nahatagan gilayon sang budget ang proyekto sang 2023 kag nasuguran ang construction sang 2024.
Magluwas sa P10 million nga ginhatag sang Philippine National Police, ang banwa ang nagdugang sang P1 million para sa finishing kaangay sang pagtiles sa pasilidad.
Ang pasilidad lamang ang nahatagan sang pondo, kag ang mga equipments kag fencing ang ginpondohan na sang Municipal Government.
Suno kay Mangilimutan ang old PNP building ang hamtangan sang pila ka opisina sang gobyerno kalakip na ang Commission on Elections, Department of Agrarian Reform, Department of the Interior and Local Government kag iban pa.
Samtang irennovate naman sini ang Municipal Hall agud didto na mabutang ang Regional Trial Court.
