Tuman ang kalipay sang asawa ni the late Negros Oriental Governor Roel Degamo bangud nasabat na ang ila nga madugay na nga ginapangamuyo matapos nga madakpan si expelled Negros Oriental 3rd District Representative Arnie Teves sa Timor Leste kahapon.
Madumduman nga nagapangatubang si Teves sang kaso nga murder, frustrated murder kag attempted murder bangud siya ang ginakabig nga mastermind sa pagpatay kay Negros Oriental Governor Roel Degamo kag walo ka iban pa sadtong Marso 4, 2023.
Sa interview sang Bombo Radyo Bacolod kay Pamplona Mayor Janice Degamo, nasabat na ang madugay nila nga ginapangamuyo kag bangud sini nangin emosyunal siya kag ang pamilya sang iban pa nga mga biktima bangud sa kalipay sa nabaton nga balita.
Suno kay Mayor Janice, ang pagdakop man kay Teves ang pinakamaayo nga regalo sa nagahilapit nga 58th birthday sang iya napatay nga bana.
Suno pa sa alkalde, ang kabuhi ni Teves ang kulang pa nga kabayaran sa mga sala nga nahimo sini sa gobernador kag sa iban pa nga mga biktima.
Ginpahayag man sini nga siya mismo ang magabisita kay Teves sa prisuhan sa tion nga ini ang madala na pabalik sa Pilipinas.
Ginpahayag man sini nga bisan ano pa ka gamhanan ang isa ka tawo, manabat gid sa layi sa tion nga may sala nga ginhimo.
