Nagapanawagan ang hepe sang Bacolod Police Station 8 sa mga pamilya nga may yara sang himata nga may deperensya sa paminsaron nga magpakig-angot sa ila talatapan agud matumod kun ila himata ang nabungguan-patay sang isa ka pribado nga salakyan sa Manville Subdivision, Barangay Pahanocoy, Bacolod City kagab-i.
Sa interview sang Bombo Radyo Bacolod kay P/Major Joery Puerto, ginpahayag sini nga wala pa sang identity ang biktima nga lalaki nga aksidente nga nabungguan sang Toyota Fortuner nga ginadala ni Victor Go, 62-anyos sang Adams St., Purok Masinadyahun, Barangay Bata.
Suno kay Puerto, nagikan sa south kag padulong sa norte nga direksyon ang salakyan sang hinali lang nga nagtabok ang biktima kag naside-swipe ini ni Go.
Nalampos ang ulo sini sa semento rason nga gilayon siya nga ginbawian sang kabuhi.
Suno kay Puerto, sabton sang driver sang salakyan ang pagpalubong sa biktima.
Yara karon sa punerarya ang bangkay sini
