Patay ang isa ka tigulang matapos malapakan sang isa ka truck nga may karga nga tubo sa Purok Ipil, Barangay Pilar, banwa sang Hinigaran nagligad nga Nobyembre 8.
Ginkilala ang biktima kay Pedro Baliwas, 89-anyos sang nasambit nga lugar kag ginapahayag may deperensya sa paminsaron.
Samtang, ang suspetsado naman ang ginkilala kay Ronnie Salazar, 37-anyos kag residente sang Barangay Camalobalo sang nasambit nga banwa.
Sa impormasyon nga nakuha sang Bombo Radyo Bacolod, nagapadulong sa norte nga direksyon ang truck nga ginamaneho ni Salazar sang hinali lang sini nalapakan ang biktima nga nagakatulog sa higad sang kampo nga may tabon sang mga dahon sang tubo.
Nakaangkon si Baliwas sang mga pilas sa nagkalain-lain sini nga bahin sang iya lawas nga nangin tunaan sang iya gilayon nga kamatayon.
Nakahunong naman sa kustodiya sang Hinigaran Municipal Police Station ang suspetsado.
