Ginpatpat ni Atty Renecito Novero ang mahimo nga tikang sang asawa kun ginaharass sang iya bana kag obligasyon sang Violence Against Women (VAW) Desk sang Barangay.
Sa interview sang Bombo Radyo sa konsehal sa ciudad sang Bacolod, sa panaysayon ni Analiza Mission Matinong angot sa pagpangharass sang iya bana, mahimo sini nga magpalapit sa barangay kag magcomplaint kun sa diin ang punong barangay ukon kagawad man ang maka-issue sang barangay protection order nga valid sa sulod sang 15 ka adlaw, nga mahimo man mapalawig tubtob sa 30 ka adlaw ukon mangin permanente na kun sa korte ini mapalapit.
Kun ini ang iviolate sang bana, mahimo nga mapasakaan ini sang criminal case ukon mapreso sa sulod sang 30 ka adlaw kun sa diin siya ang mahimo dakpon sang kapulisan ukon sang brgy tanod man.
Kun magfile naman si Matinong sang criminal case, mahimo sini nga dugangan pa nga may yara sang physical injuries, pagpakahuya sa iya sa iban nga tawo, concubinage ukon adultery man.
Samtang, ginpa-athag man sini sa Violence Against Women and their Children Desk nga kun kasado ang duha ka tawo, sila ang parehas nga may deretso sa gamit sa balay kag indi mahambal nga isa lang ang nagapanag-iya.
Gin-athag man sini nga ang criminal complaint ang yara sa jurisdiction sang prosecutors office samtang ang civil complaint naman ang yara sa jurisdiction sang barangay.
Dugang pa sini, mahimo nga maka-file sang complaint batok sa brgy kun wala nila nahimo ang ila katungdanan sa idalum sang kasugoan.
Mensahe ni Novero sa mga kababaihan nga may kaangay nga sitwasyon nga indi na pagpadugayan ang nagakatabo kag magpadulong na sa brgy ukon sa korte man.
Sa mga kalalakihan naman, suno sa abogado, kun wala naman gid sang luyag pa nga mag-upod sa asawa, magpalayo na lang kag indi na pagsakiton sang lawas kag balatyagon sang asawa.
Samtang, nagpanawagan naman ini sa VAWC nga atubangon ang ila obligasyon kag ihatag ang nagakaigo nga pag-atipan sa nagapangayo sang bulig.
