Suportado ni Bacolod City Vice Mayor El Cid Familiaran ang mensahe ni Mayor Alfredo Benitez para sa mga empleyado sang Bacolod nga indi maglantaw sang telebisyon sa tion sang working hours.
Madumduman nga gindagdagan na sang Notice to Explain ang mga empleyado sang ciudad sang Bacolod nga yara sa Treasurer’s Office matapos nga makuhaan sang alkalde sang litrato nga nagalantaw sang teleserye sa tion sang office hours.
Ang natungdan nga opisina ang gindagdagan sang memorandum kag notice to explain.
Gilayon naman nga ginmando ang pagpahukas sang telebisyon sa tanan nga mga department sa Bacolod City Government Center.
Kahapon, ginpost sang alkalde ang litrato sa Facebook page sini kag ginapahayag nga may isa ka concerned citizen nga nagpadala sang litrato sa iya talatapan kon sa diin makita nga nagalantaw sang telebisyon ang pila ka mga empleyado sang ciudad sa oras nga alas 3:00 sang hapon.
Ginremind ni Benitez, ang tanan nga mga empleyado sang ila sinumpaan sa pumuluyo kag sa ciudad.
Pahayag sang alkalde, ang mga empleyado sang gobierno ang dapat nga mag-serbisyo sang insakto kag tampad para sa mga pumuluyo nga nagakinahanglan.
Sa interview sang Bombo Radyo kay Vice Mayor El Cid Familiaran, apisar nga indi sakop sang memorandum ukon notice sang alkalde ang Sangguniang Panlungsod bangud ini ang equal body, suportado sini ang tikang ni Benitez.
Suno sa iya, maayo kun ang telebisyon ang ginagamit para sa mga kliyente ukon mga pumuluyo nga nagahulat sang ila mga transaksyon.
Suno diri, pwede ini agud makahatag sang entertainment sa mga kliyente apang indi dapat sa sulod sang opisina.
Samtang, indi naman magrelease sang statement ang head sang City Treasurer’s Office nga si Arlene Memoria bangud nakasabat na ini kag nakahatag sang eksplenasyon sa notice nga ginpadala sa iya.
