Ginakondenar sang board of directors sang Central Negros Electric Cooperative ang tikang sang Member-consumer-owners (MCO) Federation nga pag-appoint sang “peke” nga interim BOD kag pagpahalin kay Atty. Arnel Lapore bilang acting General Manager.
Nahibaluan nga una na nga gin-athag sang National Electrification Administration nga peke ang mga nagpakilala nga mga interim board of directors sang CENECO kahapon.
Sa interview sang Bombo Radyo kay Lapore, nagapatigayon sa karun sang imbestigasyon kag nagapangita sang nagakaigo nga ebidensya agud makapasaka sang kaso administratibo sa mga persona nga nagpadulong sa premises sang CENECO kahapon kag nakigbahin sa tikang sang MCO Federation.
Suno kay Lapore, may yara sang CCTV sa bilog nga premises sang CENECO kag makabulig man ang testimonial evidence sang mga tawo nga nangin kabahin sang insidente.
Suno sa iya, indi natural ukon ordinaryo nga transaksyon ang ginhimo sang mga ini kundi sila ang nagpugal sagwa kag nagtuga sang chaos kag disturbance.
Suno kay Lapore, ang board of directors ang nagapabilin sa pwesto sa sulod sang tatlo ka tuig kada termino kag sila ang ginapahanugutan nga makapapili sa sulod sang tatlo ka termino kaangay sa mga alkalde kag kongresista.
Kun mangin permanently incapacitated ukon mahukas sa iya termino ang BOD bangud sa bayolasyon sini sa NEA, sa layi ukon siya ang nalutos sa pagpapili, amu lamang ang pagdeklarar nga bakante ang iya posisyon kag indi basta-basta nga madis-og sang maskin sin-o.
Paathag sang acting General Manager sang CENECO nga sa idalum sang Republic Act 10531 nakabutang kun paano pahalinon sa pwesto ang isa ka manager ukon BOD kag ini ang wala gintuman ukon ginarespeto sang MCO Federation.
Sa karun suno sa iya, ginatun-an pa kun ano nga kaso ang igapasaka sa ila bangud sa pagpakuno-kuno nga may yara sang otoridad, estafa, illegal nga paggamit sang opisina sang CENECO kag posibilidad sang economic sabotage.
Suno kay Lapore, ila igamonitor ang insidente kag gilayon nga magabalik kaupod ang resolusyon depende sa mangin resulta sang imbestigasyon sang Philippine National Police kag sang korte.
