Teaching is My Everything ang tigulo sang tiktok video sang 28 anyos nga manunudlo sang Colegio San Agustin – Bacolod matapos ini nga nagdaog sa First Place sa isa ka national competition kadungan sang selebrasyon sang National Teachers Month.
Sa interview sang Bombo Radyo kay Marifel Chavez nga nagatudlo sa Juinor High School, iya ginpakigbahin sa video ang kabuhi sang isa ka manunudlo.
Suno diri, bilang isa ka manunudlo nga nagdako man kaupod sa bag-o nga henerasyon, natun-an man sini ang paggamit sang social media platforms kag dugang pa nga isa ini ka performing artist, nangin mahapos sa iya ang pagsulod sa competition.
Suno kay Chavez, walo ka tuig na ini nga nagatudlo kag halos ang iya kabuhi nagalibot na lang bilang isa ka manunudlo.
Masami ini nga nagakawad-an sang oras magpreparar kag bisan recess kag lunch break sini, iya ginahatag ang oras sa iya nga trabaho.
Aminado man ini nga wala sang husto nga pahuway ang mga manunudlo nga nagakagab-ihan sa pagpauli, ginadala ang trabaho sa balay kag bisan weekends nagabalik sa gihapon sa buluthuan para lang magtrabaho.
Ini man kwestyon ni Chavez kun paano ayhan mahatag sang manundulo sang kalidad nga edukasyon ang estudyante kun sila kulang sa preparasyon kag pahuway.
Ginhatagan sini sang tigulo nga Teaching is My Evertyhing ang iya tiktok video nga suno sa iya ang iya kabuhi nagtiyog lamang sa pagtudlo.
Nangin motibasyon man sini ang iya mga estudyante nga sa tanan nga kakapoy sini, siya nalipay sa gihapon sa nahatag nga edukasyon.
Dugang pa sini, ang pag-connect sa iya estduyantye ang iya pamaagi agud nga intindihon kag mahatag ang kabataan sang ila kinahanglan.
Apang bisan nga naga-upod ini sa pag-enjoy sa iya mga estudyante, nagabutang ini sa gihapon sang boundaries.
Sekreto ni Chavez sa pagtudlo amo nga gina-enjoy sini ang iya trabaho kag bukas ini sa madamo pa nga pagtulun-an.
