Ginpatpat ni Bacolod City Secretary to the Mayor Atty. Marty Go ang timeline sa pag-release sang subsidy sa Electric Masskara 2026.
Suno kay Go, ginremind na sang Gugma Foundation sang Setyembre pa lang ang mga kinahanglan nga requirements sa tanan nga brgy. nga magpasakop sa Electric Masskara.
Ini kasunod sa pahayag ni Punong Barangay Rommel Flores sang Brgy. Villamonte nga nakulangan sila sang oras kag preparasyon gani wala gid nila napreparahan ang ila nga float.
Suno kay Go, sang Oktubre 5, gin-ratify ang Memoradum of Agreement (MOA) para sa financial subsidy, Oktubre 6 nakompleto sang tanan participating barangays ang requirements, Oktubre 7 gintransmit na ang voucher sa budget office para sa OVR.
Sang Oktubre 8, gintransmit naman ang voucher sa accounting for carding ang audit, Oktubre 9 ginbalik sa budget office para sa actual expense kag Oktubre 12 gintransmit sa City Mayor’s Office kag City Treasurer’s Office para sa pirma, kag sa hapon yara na ini sa cashier.
Sang Oktubre 13, gin-release ang tseke sang mga participating barangays.
Suno kay Go, kinahanglan gid makompleto sang brgy ang tanan nga requirements para isa nalang kapirma kag dungan nila nga ma-release ang subsidy magluwas lamang sa Barangay 17 kag 19 nga may pending liquidation kag nagpa-reimburse.
Ginpaathag man sini nga madamo gid sang agyan basta ang budget ang halin sa ciudad gani kinahanglan nga makapasa temprano ang participating barangays agud mahatag gilayon ang pondo.
Sa pihak sini, ginpahayag ni Go nga gina-review sang City Legal Office ang MOA sang ciudad kag mga brgy angot sa ginhatag nga P300,000 nga subsidy para sa ila nga entry.
