Nagreklamo ang residente sa Brgy Dulao, Bago City nga apisar nagpasa sang mga requirements, wala madala sa masterlist sang payout sang Department of Social Welfare and Development para sa mga apektado sang Bagyo Tino, samtang may duha ka miyembro sang isa ka pamilya nga nalakip sa listahan.
Sa interview sang Bombo Radyo Bacolod kay Ems Mateo, residente sa Purok Soledad, Brgy Dulao, balik-balik sila sa pagproseso sang mga requirements apang pagdangat sa payout area, sila ang wala na sa listahan.
Ginatudlo naman sila sang DSWD personnel nga mangayo sang eksplinasyon sa Barangay, gani siya ang nag-absent gid sa trabaho agud mangayo sang klaripikasyon, apang sila ang wala man gin-atubang ni Dulao Punong Barangay Rey Guzon.
Suno diri, dugay-dugay pa sila gin-atubang sang Barangay Secretary nga kaangay nga nagrehears pa sang iya nga ihambal, nga suno diri lunsay lamang kabutigan.
Dugang pa sini nga nagatinudlu-anay lamang ang mga opisyal kun sin-o ang balasulon.
Paathag sa ila sang DSWD Personnel nga kun ano ang lista nga ginpadala sang Barangay, amo ang ginhatagan sang budget, apang kaangay nga madamo sang kulang sa listahan nga ginsumiter sang Brgy gani madamo sang wala nakabatun.
Apang kwestyon ni Mateo bangod may mga nahibaluan sila nga Brgy Kagawad nga duha ka miyembro sang iya panimalay ang nalakip sa listahan.
Ginpahayag man sa ila nga wala na sang 2nd batch sang cash assistance, gani sila ang dapat magpamangkot na lamang sa Barangay kun ano ang ila mabulig sa mga biktima nga wala mahatagan.
Dugang pa nila nga ang pamilya sang mga Brgy officials ang kumpleto sa masterlist, nga maathag gid bangod sa sunod-sunod nga palarehas nga apelyido.
