Tatlo ang patay kalakip ang duha ka menor de edad nga hinablos kagab-i matapos malumos sa Bago River kahapon.
Suno kay Ryan Valero, pinuno sang Operations and Warning sang Bago City Disaster Risk Reduction and Management Office, nakabatun sila sang tawag nga may nagluntad nga drowning incident sa Bago River sa Purok Paho, Barangay Napoles, Bago City.
Una nga ginpahibalo sa ila nga may tatlo ka nalunod nga indibidwal samtang nagapaligo sa suba, samtang sang nagahimos na ang mga ini para sa search and rescue, nakabaton ang mga ini sang tawag nga nakita na ang bangkay sang 11 anyos kag 16 anyos nga mga bata nga babayi nga nalumos.
Samtang ginpreparar naman nila ang ambulansya, nakabatun ang mga ini sang impormasyon nga nakita naman ang lawas sang tiya sang duha ka bata nga ginkilala kay Riza Macatigos, 31 anyos kag ini ang wala na sang pulso.
Ginsugata naman sang mga ini ang salakyan nga nagkarga sa biktima kag gilayon nila nga ginpatigayon ang cardiopulmonary resuscitation (CPR) tubtob sa makadangat sa Bago City Hospital.
Apang wala na nagresponder ang biktima tubtob sa gindeklarar na nga patay.
Santo sa nabatun sang mga ini nga impormasyon, may birthday nga gintambungan ang mga biktima kag nagdesisyon nga magpaligo sa suba.
Nagahampang naman ang duha ka kabataan kaupod ang 13 anyos nga bata nga babayi ni Macatigos.
Tubtob sa gintikwang sang isa sa mga bata ang 13 anyos gani ini ang nahulog samtang nahawiran naman sini ang mga pakaisa gani ulupod ang tatlo nga nahulog sa madalom nga bahin sang suba.
Paathag ni Valero nga ang suba ang may bahin nga hinali nalang nga nagadalom.
Bangod nakahibalo maglangoy ang 13 anyos, siya ang nakapahigad apang nabilin ang 11 kag 16 anyos sini nga pakaisa nga lunsay indi kabalo maglangoy.
Matapos makita ni Macatigos ang nagakapakapa nga mga kabataan, gilayon man ini nga naglumpat sa tinutuyo nga masalbar ang duha ka hinablos, apang bangod sa indi man ini nakahibalo maglangoy siya ang nakaupod sa pagkalunod.
Ang 13 anyos nga bata amo naman ang nagtakas kag nagpangayo sang bulig.
Pahanumdom man sini sa mga pumuluyo ilabi na nga nagahilapit na ang summer season kag uso ang mga outing nga likawan ang pagpaligo sa lugar.// Ginakasubo man sini nga may tatlo na nga biktima sang delikado nga suba.
