Nagalaom ang tiya sang manunudlo sa Binalbagan Catholic College nga ginbuno-patay kahapon sang kaagahon nga magpatigayon sang massive manhunt operation agud nga madakpan na ang duha pa sa tatlo ka mga suspek.
Nahibaluan nga kahapon, nadakpan na ang 19 anyos nga isa sa mga suspetsado sa pagpatay kay Tony Lazaga, 51 anyos, kag newly-appointed nga adviser sang Supreme Student Government sang Binalbagan Catholic College.
Ang suspetsado ang ginkilala nga si Johnrey Castino alyas Jansen, 19 anyos kag residente sa Purok Apitong, Barangay San Teodoro, Binalbagan.
Sa interview sang Bombo Radyo Bacolod kay Merlita Bernal, sang natabo ang insidente ginhulat nila ang magulang sang biktima agud nga makadtuan sa Binalbagan agud nga mahibaluan gid kun ano ang natabo.
Suno kay Bernal, ginpahibalo lamang sila nga si Lazaga ang ginhold-up kag napatay na.
Suno diri, ang abyan sang iya hinablos ang nagpahibalo sa natabo diri sa magulang sang biktima.
Ginalantaw man sini nga may yara sang foul play sa natabo sa hinablos sini bangud tuman kadamo ang gin-agom nga pilas tuga sang pagbuno.
Suno kay Bernal, dapat madakpan ang duha agud mahibaluan gid kun ano ang matuod nga natabo bangud para iya, madamo man sang bersyon sang estorya nga ginahimo sang mga suspek ilabi na ang ginapahayag nagagamit ini sang illegal nga druga.
