Nagpanawagan ang tiyo ni Pearl Joy Galve sa stepfather sini nga kun wala man ini sang sala, mas maayo nga maggwa ini kag klaruhon ang iya bahin.
Sa interview sang Bombo Radyo kay Elbert Ortiz, tiyo ni Pearl Joy, luyag sini nga ihaya ang iya hinablos sa ila balay sa Purok Pag-asa, Brgy Sum-ag, ciudad sang Bacolod, apang nagsuhestyon ang ABE Funeral Homes nga deretso na lang ini nga ilubong bangod nga yara na sa state of decomposition ang bangkay.
Suno diri, dako ang ila nga pagsalig kay Rene John Nasis alyas ‘Negro’, nga amo ang stepfather ni Pearl Joy, bangod nga walo ka tuig na sila nga naga-upod ni Jennifer.
Dugang pa sini, may update man nga nagakabaton si Jennifer gikan kay alyas ‘Negro’ apang wala sila nakahibalo kun ano ang ila nga gina-esturyahan.
Panawagan ni Elbert kay alyas ‘Negro’ nga magpakita na ini kag klaruhon ang iya bahin.
Samtang, nagapanawagan man ini sa kun sin-o gid man ang suspek nga nagpatay sa iya hinablos nga magsungka na.
Sa karun, ginahulat pa ang autopsy result kag wala pa sang update kun diin na nagatinir ang stepfather ni Pearl Joy.
