Patay ang tiyo matapos nga ginlabo sang kaugalingon nga hinablos sa Sitio Pasto, Purok 5, Barangay Basak, Cauayan, Negros Occidental.
Ginkilala ang biktima nga si Alyas Romel, 44 anyos, may live in partner kag ang suspetsado ang ginkilala nga si Alyas Jay-R, 26 anyos, kasado kag lunsay mga residente sang nasambit nga lugar.
Sa interview sang Bombo Radyo Bacolod kay Police Lt. Raffy Billiones, Deputy Chief of Police sang Cauayan Municipal Police Station, alas-8:00 ang takna sang gab-i nagkadto ang hinablos sa tiyo sini kun sa diin naghambal ang tiyo nga indi anay pag-araduhon ang common nila nga duta.
Suno kay Billiones, samtang padayon ang pag-estoryahanay sang magtiyo nga nagdangat sa indi pagintsindihanay nga nagresulta sa paglabo sang hinablos sa biktima.
Nakaagom sang pilas sa likod sang ulo ang tiyo nga gintunaan sang kamatayon sini.
Nakahunong na ang suspetsado sa Cauayan Municipal Police Station kag desido ang pamilya nga magpasaka sang kaso batok diri.
