Patay ang tiyo matapos ginbuno sang iya hinablos samtang pilason naman ang suspetsado matapos nga ginbuno man ang iya kaugalingon sa Prk Paghidaet, Barangay Tangub, Bacolod City kahapon sang aga.
Ginkilala ang biktima kay Ciriaco Pabalinas, 49-anyos samtang ang suspetsado naman amo si Mark Lowell Atiemza, 34-anyos kag lunsay mga residente sa amo nga lugar.
Sa interview sang Bombo Radyo Bacolod kay P/Capt. Armilyn Vargas, hepe sang Bacolod Police Station 8, ginpahayag sini nga samtang nagapreparar sang pamahaw ang tiyo, sa wala mahibaluan nga rason, hinali nalang ini nga ginbuno sang pila ka bes sang iya hinablos gamit ang kutsilyo kun sa diin nakaangkon ini sang pilas sa iya nga dughan.
Pagkatapos sadto suno kay Vargas, makapila ka bes man nga ginbuno ni Atiemza ang iya tiyan.
Gilayon nga gindala sa Corazon Locson Montelibano Memorial Regional Hospital ang duha apang gindeklarar nga dead on arrival si Pabalinas samtang padayon pa nga ginabulong ang suspetsado.
Suno sa hepe, wala sang may gin-awayan ang duha apang ginapahayag nga nagasufrer sang depresyon si Atiemza kag walo ka adlaw na ini nga wala sang tinulugan.
Indi pa matul-id kun nagagamit ini sang iligal nga druga suno kay Vargas apang may yara na ini sang record sa police station sa kaso nga pagpangawat.
Sa karon ginahulat pa sang kapulisan ang desisyon sang pamilya kun mapasaka sila sang kaso batok sa suspetsado.
