Ginpahayag ni Toboso Municipal Mayor Richard Jaojoco nga natak-an na ang mga pumuluyo sa indi maayo nga serbisyo sang Northern Negros Electric Cooperative kag bukas ini sa privatization.
Sa interview kay Jaojoco, indi man ini magpati nga mas mahal ang rate sang kuryente sa privatization apang sa paglantaw sini mas mahal ang rate sang kuryente sa kooperatiba.
Suno kay Jaojoco, magluwas sa rate sang kuryente dapat man nga lantawon ang ginahatag nga serbisyo sa mga kunsumidor.
Suno diri, okay siya sa 70-30 sharing kaangay sang joint venture agreement sa tunga sang Central Negros Electric Cooperative kag Negros Electric and Power Corporation.
Dugang pa sang alkalde nga tuman ka inferior ang ginahatag nga serbisyo sang NONECO kag natak-an na ang mga tawo sa ini nga sahi sang pagserbisyo.
Ginhambalan man sini si Bishop Gerardo Alminaza nga dapat lantawon ang ginhatag nga serbisyo sang mga pumuluyo.
Aminado man ini nga manami pamatian nga kooperatiba ang nagaserbisyo para sa ginagamit nga kuryente sang mga pumuluyo apang dapat gid lantawon ang klase sang serbisyo nga ginahatag sa mga tawo.
Gindayaw man sini ang serbisyo sang MORE Power kag nakita sini ang ginahimo nga maintenance indi kaangay sang NONECO nga may masangit lang nga sanga sang kahoy ma-brown out gilayon.
