Wala naglaom nga nagnumber 1 sa 2023 physical therapist licensure examinations nga tumandok sang San Carlos City, Negros Occidental nga mangibabaw ini sa mga nakapasar sa nasambit nga pasinawan.
Sa interview sang Bombo Radyo Bacolod kay Ma. Angelica Dela Victoria, aminado ini nga nabudlayan siya sang nagtake siya sang physical therapist licensure examinations gani nagpangamuyo ini sa Ginoo nga makapasar lamang siya kag bisan indi na siya malakip sa mga top notchers.
Apang nakibot lamang ini sa nangin resulta sang nasambit nga pasinawan bangud siya ang nagnumber 1 sa mga passers sa bug-os nga Pilipinas.
Suno kay Dela Victoria, pagkatapos sini kuha sang exam, nagpangduha-duha pa ini bangud may yara ini sang mga questions nga wala masabtan.
Dako ang pagpasalamat sini sa iya mga ginikanan, mga utod, pamilya kag mga nagsuporta sa iya tubtob nga nalab-ot ang kadalag-an.Si Dela Victoria ang naggraduate sa Riverside Medical College kag ginestorya sini nga kun ngaa sa tanan nga kurso, physical therapist ang ginkuha sini, kag ini amo nanamian lamang ini sang laboratory gowns nga may initials.
Bangud nakapasar na ini sa licensure examination, plano sini nga magtrabaho sa Cebu bilang physical therapist kag mahimo man nga magproceed ini sa Medicine.
Panugyan sini sa nagaeskwela agud nga mangin physical therapist nga magwork hard, magsalig sa kaugalingon kag magpangamuyo agud nga magiyahan sa paglab-ot sang handum.
