Daw indi pa makapati ang nagnumber 1 sa Physical Therapists Licensure Examination nga graduate sang Riverside College nga siya ang nagpanguna sa tanan nga exam takers sa bug-os nga Pilipinas.
Sa interview sang Bombo Radyo Bacolod kay Raymund Carlo Masbaño, feeling surreal man ini sagihapon bangud tuman kadamo ang nagsend sa iya sang mensahe agud magcongratulate.
Suno sa iya ginaproseso pa sini ang pagpanguna sa pasinawan.
Apang aminado ini nga siya ang nagpreparar gid man agud malakip sa Top rankings.
Suno kay Masbaño, pagkagraduate nag-umpisa na ini gilayon sa pagreview.
Panugyan sini sa tanan nga wala nakapasar sa Physical Therapists Licensure Examination nga indi lang madulaan sang paglaom bangud indi pa ulihi ang tanan kag may mga madason pa nga board exam.
Dugang pa sini nga dapat may clear goal kag dapat tinguhaon nga malab-ot ang mataas nga pwesto.
Suno diri agud nga mangin madinalag-on ang pagpaninguha ang updan gid sang pagpangamuyo agud nga magiyahan kag ubayan sa paglab-ot sa handom.
Plano ni Masbaño nga magproceed sa medicine bangud maayo nga pre-med course ang Physical Therapists.
Ginpahayag man sini nga depende pa kun sa diin ini maeskwela liwat.
Ginpasalamatan ni Masbaño ang iya mga ginikanan nga nagsuporta gid sa iya humalin pa lamang sang umpisa.
Nagapasalamat man ini sa iya mga classmates kasubong man sa iya special someone nga yara humalin sang nagreview tubtob nga siya ang nakapasar.
Labaw sa tanan, dako ang pagpasalamat sini sa mahal nga Makaako nga nagtugot nga siya ang indi lang makapasar kundi mag-Top 1 sa Physical Therapists Licensure Examination.
