Nadakpan ang Top 2 kag Top 3 Regional-level Most Wanted Person sang Police Regional Office – Negros Island Region sa parehas nga adlaw.
Ang Top 2 Most Wanted Person ang ginkilala nga si Angelo Sevilla, 23 anyos, single, wala sang trabaho kag residente sang Prk Esmeralda, Brgy Poblacion, San Enrique, Negros Occidental.
Siya ang may kaso sa paglapas sa Republic Act (RA) 8353 kag RA 11648 matapos ginhimuslan sini ang iya ex-girlfriend nga menor de edad.
Siya ang nadakpan pinaagi sa Manhunt Charlie Operation sang San Enrique Municipal Police Station matapos ginpagwa ang Warrant of Arrest sang Agusto 7.
Samtang nadakpan man ang Top 3 Most Wanted Person nga si Edric Malundo alyas Toto, 44 anyos, kasado, mangunguma kag residente sa Osmeña Street, Brgy Poblacion 1, Sagay City, Negros Occidental.
Siya ang may kaso nga homicide matapos ginbuno-patay ang kaupod sa pag-inom sang makahulubog nga ilimnon sa isa ka bar sa Gasatay Street, Brgy. Poblacion, Sagay City, bangod sa pagpangimon sa isa ka babayi nga waiter.
Ang warrant of arrest sini ang gin-issue sang Hulyo 26 subong nga tuig.
Samtang wala naman sang ginarekomendar nga pyansa sa iya nga kaso.
Sa interview sang Bombo Radyo Bacolod kay PRO-NIR Spokesperson Police Lt Col. Joem Malong, ang pag-aresto sa Top 2 kag 3 Most Wanted Person sa rehiyon ang resulta sang law enforcement operations kag pagserbe sang warrant of arrest.
Magluwas sa duha, sa kaangay nga adlaw, nadakpan man ang Top 1 Municipal-level Most Wanted Person sang Manapla Municipal Police Station.
Ini ang ginkilala nga si Reynante Piso, 47 anyos, kasado, laborer kag residente sang Hacienda Maja 2, Brgy San Pablo, Manapla, Negros Occidental.
Ang suspect ang ginatudlo nga imbulbado sa pagplano sa isa ka insidente sang pagpangluthang.
Suno kay Malong, sa tion nga may mafile na nga kaso sa isa ka persona, sila ang nagapatigayon sang monitoring.
Apang ginahulat pa nila nga maggwa ang warrant of arrest, antes ini ang gilayon nga maaresto.
Panawagan sini sa mga pumuluyo nga kun may kilala nga wanted person ukon may mamutikan nga unlawful activities, indi magkahadlok nga manugid sa kapulisan.
