Indi sa gihapon makapati ang nag top 3 sa Medical Technologist Licensure Examination nga madala ini sa top 10.
Sa interview sang Bombo Radyo kay Ralph Jason Tulmo sang Riverside College, humalin sadto ginpalangga na sini ang medical technology.
Suno diri, wala naman nangin mahapos ang iya naagyan sang siya ang naga-eskwela pa bangod sa madamo nga tulun-an apang siya ang naggradwar bilang Suma Cumlaude kag Valedictorian sang ila batch.
Aminado man ini nga siya nagduha-duha kun siya madala sa top 10 matapos ang examination bangod nga wala sini naantisipar ang kabudlayan sang exam.
Apang, nagapati naman ini nga may dako nga tsansa nga siya ang makapasar.
Sa paggwa sang result, tubtob sa karun halos indi pa sini mapatihan nga siya ang nagtop 3.
Ginpahayag man sini nga sang siya ang naga-review para sa exam, nagpalayo ini sa social media kag sa tanan nga makadistract sa iya, sa bulig man sang iya ginikanan.
Sa karun, nagapati si Tulmo nga dako ang posibilidad nga siya ang magasunod sa amay sini, kun sa diin ang iya amay ang nagtop 1 sadto sang ini nagkuha sang licensure examination.
Mensahe ni Tulmo para sa tanan nga estudyante nga magpadayon agud malab-ot ang luyag nga handum, disiplinahon ang kaugalingon, kag mag-effort kag mag-commit sa pagtuon.
