Naaresto sang mga kapulisan sang Pontevedra Municipal Police Station ang top 4 most wanted person Municipal level, sa kaso nga rape.
Ginkilala ang nadakpan kay alyas Angelo, 44-anyos, wala sang trabaho, kag pumuluyo sang Sitio Pinabalunan, Barangay Antipolo, Pontevedra, Negros Occidental.
Sa interview sang Bombo Radyo Bacolod kay Police Captain Darryl Kuhutan, Chief of Police sang Pontevedra Municipal Police Station, ang biktima sang arestado amo ang tatlo man sini ka mga kabataan.
Suno kay Kuhutan, gintinguhaan sang mga ini nga maaresto ang suspek kag nadakpan nila ini sa ciudad sang Sagay paagi man sa ila nga tracker team.
Ang suspek ang nagasaylo-saylo lamang sang lugar tubtob nga natultulan sang tracker team sang Pontevedra Municipal Police Station.
Suno kay Kuhutan madugay antes maserbe ang warrant of arrest kay Alyas Angelo bangud madugay naman ini nga nagapanago sa ciudad sang Sagay sa pamilya sang iya iloy.
Nadakpan ini matapos nga ginserbe ang warrant of arrest batok diri sa kaso nga 6 counts of rape kag no bail recommended.
Suno sa hepe may yara pa ang suspetsado sang duha pa ka iban nga warrant of arrest.
Ginpahayag nga nahimo sang suspek ang pagpanghimulos sa mga kabataan sini nga menor de edad pa sadto sang napatay ang asawa sini.
Nagpanugyan man si Kuhutan sa mga babayi ukon sin-o man nga makaeksperyensya sang pagpang-abuso nga indi magkadlok kag ireport gilayon sa mga kapulisan agud sila ang mabuligan.
