Arestado ang Top 9 Most Wanted Person Provincial Level sa ciudad sang San Carlos, Negros Occidental.
Ginkilala ang nadakpan kay Rony Batosin, 34 anyos, residente sang SCCMC Compound, Barangay 1, San Carlo City kag ini ang nagapangatubang sang kaso nga paglapas sa RA 9165 ukon Comprehensive Dangerous Drugs Act of 2002.
Sa interview sang Bombo Radyo Bacolod kay Police Lt. Col. Eduardo Corpuz, officer-in-charge sa San Carlos City Police Station, madugay na nga ginamonitor sang mga kapulisan sa San Carlos City si Batosin kag number 2 naman ini nga wanted person city level sang ciudad gani gintutukan gid ini kag sang Miyerkules, Enero 10, nakakuha sila sang kahigayunan nga maaresto ini.
Suno kay Corpuz, mahimo nga kapin isa na ka tuig nga yara sa listahan sang wanted person ang nasambit nga persona.
Suno diri, prayoridad nila sa karun nga mahatagan sang solusyon ang problema sang ciudad sa illegal nga druga nga nahibaluan man sang tanan nga indi lang ang ciudad sang San Carlos ang nagaproblema kundi ang bug-os nga Pilipinas.
Kabahin sang ila plano ang madakpan ang mga most wanted persons kasubong man ang mga other wanted persons.
Nagpanawagan man ini sa mga pumuluyo sa ciudad sang San Carlos nga buligan ang mga kapulisan nga mapabilin ang peace and order sa cuidad.
